tTok, artea hurbilagotik Uztaritzen
2019ko Irailaren 18a
Artista tailerra arte leku irekia bilakatu da. tTok-en hemengo eta hango artisten obrak erakutsiko dira. Lekuak 30 metro karratu ditu lurrean eta horiek bezain beste paretetan. Deneri irekia da.
Hasieran artista tailerra zena eraldatzen joan da. Azken pausuan erakusketa gela bilakatu da eta tTok izena hartu du. Duen kokapenak, Uztaritzeko Purgu auzoan, plazatxo batean herriko hiru jatetxeetatik hurbil-hurbil, ikusgarritasuna ematen dio eta halako egitasmo bat plantan jartzeko ezaugarriak eskaintzen.
Itxura eman dezakeen arren ez da galeria bat. Artista batek besteei irekitzen dien lekua da. Hortaz artistak gomitatu eta erakusketa komunak antolatuko dira zenbait aldiz urtean, hilabete bateko ala biko iraupenarekin. Hortik kanpo iF bertako artistaren obrak ikusgai izanen dira.
